ACHINJWA NA BABA YAKE WA KAMBO

Katika hali isiyokuwa ya kawaida, baba mmoja mkoani hapa anadaiwa kumuua kinyama mtoto wake wa kambo wa miaka miwili kwa kumchinja hadi kumuondoa koromeo lake. Tukio hilo la kinyama, linadaiwa kutokea hivi karibuni katika Kijiji cha Uyogo, tarafa ya Mweli wilayani Kahama ambapo aliyeuawa ni mtoto Zawadi Steven. Kamanda wa Polisi wa Mkoa wa Shinyanga, Shaibu Ibrahim, amemtaja mtuhumiwa anayedaiwa kufanya tukio hilo la kinyama kuwa ni Hamis Masuhu. Akasema tukio hilo limetokea usiku wa Februari 19, mwaka huu katika kijiji cha Uyogo, tarafa ya Mweli wilayani Kahama. Amesema chanzo cha mauaji hayo ni wivu wa kimapenzi baina ya mtuhumiwa huyo na mama wa mtoto huyo aliyetajwa kwa jina la Sofia Lutonja. Kamanda Ibrahim amesema Jeshi la Polisi linaendelea kumsaka mtuhumiwa wa mauaji hayo kwa vile alitoroka mara baada ya tukio.